paj huam rau peb nyeem laug caij

Mob kuv siab es koj puas hnov

Thaumm kuv muaj mob xav los qhia
Kuv txoj sia yuav tus tiag li lawm
Yuav rho tawm ntawm ntiaj teb mus
Cas tsis tus ua kuv nco koj heev heev
Lub suab seev thiaj sawv li tsees tawm
Me nkauj nrawm sawv tsees quaj
Vim nco muaj tsis paub qhia leej twg
Tam lub lwg ua tauv dej raug tshav ntuas
Mob plhu mluas tsis txawj zoo
Kuv tau nroo koj puas hnov
Tav ntuj nov nco koj tsis zais
Nws yuav rais mus ua kab lwj siab
Koj tus ntxhiab tso tsis tawm hauv kuv plawv
Nws tseem sawv nraim nrog kuv ntsuj duab
Nws tseem puab koj lub plawv tsis ploj
Tos ntsoov koj los hlub dua
Tus kuv tshua nco tag npaum li os
Kuv tseem tos koj txhua lub caij
Tseem hu taij koj lub npe mus li
Tseem yuav ntxhi yog koj rov los

Ntiaj teb twb mus lawm zuj zus
tsis xav txog tus neeg kuv hlub
tus thaum ub yog kuv lub teeb thawj
tus neeg txawj hlub thiab txawj qhia
Yug kuv txoj sia nres kuv lub suab quaj

Tus neeg muaj txoj kev hlub tseeb
Yog lub teeb ua rau kuv pom kev
Leej txiv tsev tus zoo rau kuv tshaj
Lub ntuj kaj kuv muaj koj tas li
Luag ntxhwb ntxhi nrog koj nyob

Tus kuv txob tas txhua sij hawm
Koj mus lawm tau ntev loo tiag
Koj suab npliag tsis hnov lawm zus
Tsis paub mus nrhiav koj qhov twg
Tam lub lwg poob rau hauv av

Cug tes ncav kov tsis tau cuag
Ua kua muag poob txeej los si
Tam dej ci ntws mus lawm deb
Nco thaum peb tseem sib hlub heev
kuv thiaj seev txog koj lub npe

Thaum ua ke tsis sib nrug kiag
Kuv nco tiag tsis paub hais qhia
Kuv txoj sia yuav tu tiag tiag
Kuv sawv liag thiab zaum ntua
Cas yuav tshua thiab nco koj ua luaj

Kua muag tawm tuaj mob siab ntsws
Txoj kev tws siab nrhiav koj nraim
Kuv yeej maim tsis nrhau qhov nco
Mus txhua hmo nyob txhua hnub
Koj suab qhub kuv nco tsis ploj

Xav hu koj tuav koj lub npe rawv
Hnov kuv plawv mob ntoj nqig ntoj nqig
Tig ib ncig los tsis txawj zoo li
Ntuj tsaus nti teb tsaus ntais
Xav tau txais koj lub suab npliag

Nco koj tiag yuav tuag li os
Cas siab yuav nco koj tag npaum li
Tsis hnov koj ntxhi thiab koj lo lus
Siab tsi tus yuav ua cas os tus kuv nco aw.....!

Muab koj lub siab los rau kuv puag
Muab koj txhais tes los rau kuv tuav
Muab koj lub ntsws los rau kuv plhws
Muab koj caj npab los rau kuv ncoo
Muab koj lub suab los nrog kuv nroo
Muab koj lub cev los rau kuv ev...

Muab koj txhua yam los tuav kuv lub nplooj siab tseg.
Koj yog txhua yam nyob hauv kuv lub neej
Joj thiaj yog tus kuv ntseeg thiab kuv hlub
koj yog lub hnub ci sov kuv tej siab ntsws.
Yog tus kyv plhws ntshis
Yog tus muaj nuj nqis
Kuv thiaj hkub koj mus ib txhis